Цахилгаан тэжээл бүхий нисэх онгоцны анхны нислэг

Цахилгаан тэжээл бүхий нисэх онгоцны туршилтын загварын анхны нислэг амжилттай хийгдсэн байна. Ийм төрлийн онгоц бүтээх судалгааг НАСА-ын эрдэмтэд анх хийж эхэлсэн боловч Германы Штутгартын Нисэх Загварын Дээд сургуулийн судалгааны баг eGenius хэмээх туршилтын загварыг бүтээж нислэгийн үеийн өгөгдлүүдийг цуглуулан шинжилгээ хийх зорилгоор нисгэж туршчээ. Хөдөлгүүргүй нисэх онгоц (планер)-той төстэй хэлбэр бүхий туршилтын загварын далавчны үзүүр хоорондын зай 16,9 м, их биеийн урт 8.1 м юм. Мөн бүхээгний өргөн 1 м учир зэрэгцээ байрлал бүхий хоёр суудал байрлуулахад хүрэлцээтэй зай талбайтай юм. Онгоцны сүүл хэсэгт байрлах сэнс 60 кв чадал бүхий цахилгаан хөдөлгүүрийн тусламжтайгаар минутад 2000 эргэлт хийх боломжтой. Хөөрөх үеийн хамгийн бага жин 850 кг бөгөөд 235 км/ц хүртэл хурдалж, нийлбэр дүнгээр 180 кг-аас ихгүй жинтэй 2 зорчигчийг 400 км хүртэлх зайд тээвэрлэх чадвартай юм байна. Германы Mindelheim хотод хийгдсэн туршилтын эхний нислэг 20 минут үргэлжилсэн бол хэд хоногийн дараа хийгдсэн 2 дахь нислэг 36 минут үргэлжилжээ.




эх сурвалж; gizmag

Синхрон орчуулгын технологи

NTT Dokomo компаний хөгжүүлж буй хүний ярианы шууд (синхрон) орчуулгын үйлчилгээний туршилтын хувилбарыг Wireless Japan 2011 үзэсгэлэнд танилцуулсан байна. Энэ удаад япон хэлээр бичигдсэн сонинг унших үед орчуулга хэрхэн явагдаж байгааг үзүүлсэн бөгөөд уншиж буй хүний яриа шууд орчуулагдан танхимд байрлуулсан таблетийн тусламжтайгаар текстийг дэлгэц дээр харуулж, англи орчуулгыг сонсгожээ.

Уг үйлчилгээг хүний ярианы агуулгыг таних, автоматаар орчуулга хийх, орчуулсан текстийг дуу хоолойд хувиргах 3 технологийн нэгдэл гэж хэлж болно. Эдгээр технологиуд нь өөр өөр компаниудад бүтээгдсэн боловч тус компаний хувьд тэдгээрийг нэгтгэж тухайн эгшинд ярианы шууд орчуулга хийхийг зорьж байгаагаараа онлог юм. Хүний яриаг таньж текстэд хувиргах технологийн боломж 100%-д хүрээгүй байгаа бөгөөд таних, хувиргах нарийвчлалыг хангалттай хэмжээнд хүртэл нэмэгдүүлэх шаардлагатай байгаа юм.

Автомат орчуулгын хувьд мөн адил нарийвчлалын асуудал бүрэн шийдэгдээгүй байна. Технологийн боломж хэдий хугацааны дараа 100% болох вэ гэдгийг хэлэхэд хэцүү боловч тодорхой хэмжээний орчуулгын алдаа гарсан ч хэрэглээний ямар нэг хэлбэр, боломж байгаа эсэхийг тодруулах зорилгоор энэ жилдээ багтааж хязгаарлагдмал хүрээнд хэрэглээнд нэвтрүүлж туршихаар төлөвлөж байна.




Дашрамд хэлэхэд текстийг хүний ярианд хувиргах технологийн боломж бараг 100%-д хүрээд байна. Үүнийг энд дарж туршиж үзэх боломжтой бөгөөд гадаад хэл сурч байгаа хүмүүс дуудлага болон сонсголоо сайжруулах зорилгоор ашиглахад тохиромжтой юм. Мөн гадаад хэлээр ямар нэгэн илтгэл хийхээр төлөвлөж байгаа бол аудио бичлэг хийж сонсох, дагаж ярих зэргээр давтах боломжтой.

эх сурвалж; diginfo

Товчлуурын даралтаар хэн болохыг чинь танина

Японы NTT communication компани компьютерээр бичих үед гарны товчлуур даралтын онцлогийг үндэслэн тухайн хүн мөн эсэхийг тодорхойлох програм хангамж бүтээсэн байна. Уг програм нь бусдын нэвтрэх эрхийг хууль бусаар ашиглан сүлжээнд холбогдож байгаа эсэхийг тодорхойлох ач холбогдолтой учир зайн сургалт зэрэг онлайн үйлчилгээнд ашиглах боломжтой бөгөөд энэ жилээс эхлэн хэрэглээнд нэвтрүүлэхээр төлөвлөж байна. Keystroke dynamics хэмээгдэх энэ арга нь хурууны хээ, нүдний солонгон бүрхэвчийн зураг авахтай адил хэн нэгэн хүнийг бусдаас ялган таних технологийн нэг төрөл бөгөөд хуруу компьютерийн товчнуудад хүрэхээс авхуулаад хөндийрэх, дараагийн товч дарах хүртэлх хугацаа болон давтамж зэрэг нь хүн бүрт өөр өөр байдаг онцлогод тулгуурлажээ.

Урьдчилан 1000 орчим үсэг бүхий текст бичүүлж авах тохиолдолд түүнээс үндэслэн тухайн хүний товчлуур даралтын онцлог зуршилыг тодорхойлох боломжтой болох бөгөөд дараагийн удаад 150 үсэг бүхий бичилт хийх бүрт тухайн хүний бичилтийн онцлогийн тохиромжийг шалгадаг байна. Үүний тулд тухайн хүний товчлуур даралтын мэдээллийг сүлжээгээр дамжуулан шалгагч серверт онлайнаар хүргэх шаардлагатай. Туршилтаар энэхүү аргын таних магадлал бараг 100 % гэдэг нь батлагдсан байна. Хэн нэгэн хүнийг компьютер хэрэглэх явцад нь тасралтгүйгээр үргэлжлүүлэн шалгах боломжтой учир бусдын нэвтрэх нэр, нууц үгийг хууль бусаар ашиглан сүлжээнд нэвтэрсэн ч богино хугацаанд илрүүлэх боломжтой юм. Энэ програмыг их сургуулиудын зайн сургалтын шалгалтын үед бусдын өмнөөс шалгалтад орж байгаа эсэх, мөн бэлэн материал хуулж байгаа (copy paste) эсэхийг илрүүлэхээс гадна гэрээр ажилладаг хүмүүсийг хянахад ашиглах боломжтой ажээ. Мөн нэмэлт тусгай төхөөрөмжүүд шаардлагагүй, програмыг суулгах төдийд ашиглах боломжтой болох учир хувийн карт болон хурууны хээ шалгах аргуудаас илүү хямд өртөгтэй юм.

Дашрамд хэлэхэд манай онлайн ертөнцөд санаатай болон санамсаргүйгээр элдэв зорилго бүхий мэдээлэл тараах тохиолдол цөөнгүй гардаг билээ. Наад захын жишээ гэвэл улс төрчид зэрэг хувь хүмүүс болон ямар нэгэн компани, байгууллагын нэр хүндийн эсрэг, зарим тохиолдолд хууль бус үйлдэлд уриалан дуудсан бичлэгүүд сэтгэгдэл хэлбэрээр олонтоо нийтлэгддэг. Иймэрхүү үйлдлүүдэд тухайн этгээдийг IP хаягаар хөөж олох боломжтой боловч интернет кафе зэрэг өөр өөр компьютер ашиглах тохиолдолд илрүүлэхэд хүндрэлтэй. Харин энэ шинэ аргыг ашигласнаар гэмт этгээдийг илрүүлэх магадлал эрс нэмэгдэж болох юм. Техник, технологи хөгжихийн хэрээр түүнийг дагасан эерэг сөрөг үр дагавууд олон гарах болж онлайн ертөнцөөс нуугдахад улам хэцүү болж байгаагийн нэг жишээ энэ юм.


эх сурвалж; yomiuri

SugarSync

Ширээний, зөөврийн, ажлын, гэрийн гэх мэт хэд хэдэн компьютерийн хооронд файлууд хуулж зөөх шаардлага бидэнд цөөнгүй тохиолддог. Заримдаа аль нь хуучин, аль нь сүүлийн хувилбар эсэхийг ялгахад хүндрэлтэй болох, шинэ хувилбараа санамсаргүйгээр устгаx, флаш диск зэрэг зөөврийн төхөөрөмжүүд вирустэх, гэмтэхээс шалтгаалж цаг хугацаа зарж хийсэн ажил үр дүнгүй өнгөрөх тохиолдол ч гардаг. Тэгвэл үүлэн тооцооллын технологийн нэгэн үйлчилгээ таньд эдгээр хүндрэлээс зайлсхийхэд туслаж байна. Файл хадгалах онлайн үйлчилгээний SugarSync хэмээх сайт өөрийн үндсэн компьютер дээрх файлуудыг олон дахин хуулбарлаж зөөвөрлөлгүйгээр ямар ч компьютерээс удирдах боломжийг олгож байна. Энэ үйлчилгээг Windows, Mac, iPhone, Android болон Blackberry үйлдлийн систем бүхий компьютер, таблет, ухаалаг гар утас зэрэг интернет холболт бүхий төрөл бүрийн төхөөрөмжөөр хүлээн авах боломжтой юм.

Үүний тулд өөрийн үндсэн компьютерт SugarSync програмыг суулгах шаардлагатай бөгөөд өөр компьютерээс онлайнаар тухайн файлыг засварлах, өөрчлөх, устгах үйлдлүүд мөн адил таны үндсэн компьютерт хийгдэж хадгалагддаг. Мөн өөрийн үндсэн компьютерийг бүхлээр нь, эсвэл дурын фолдерийг сонгон SugarSync "үүл"-энд байрлуулах боломжтой юм. Текст, хүснэгт зэрэг оффисийн үндсэн файлууд, фото зураг, дуу, видео бичлэг зэрэг бүх төрлийн файлуудыг дэмжихээс гадна share буюу сонгосон файлыг онлайнаар бусдад түгээх, хамртан ажиллах боломжтой юм. Тус үйлчилгээ нь адил төрлийн үйлчилгээ үзүүлдэг бусад сайтуудаас олон талаар давуутай бөгөөд харьцуулсан үзүүлэлтүүдтэй эндээс дэлгэрэнгүй танилцаж болно.

2 жилийн өмнөөс нээгдсэн SugarSync үйлчилгээний төлбөрийг сар болон жилээр тооцож хийх боломжтой бөгөөд 250 Гб-ийн 1 жилийн эрх 250$ орчим үнэтэй юм. Төлбөрийн хувьд ойролцоо хэмжээний багтаамж бүхий зөөврийн хаард диск худалдаж авсанаас үнэтэй тусах боловч илүү олон боломжуудыг ашиглах боломжтойгоороо давуу талтай юм. Харин саяхнаас 5Гб-ийн хугацаагүй эрхийг үнэ төлбөргүйгээр нээлгэх боломжтой болсон байна. Энэ нь хангалттай хэмжээний оффисийн бичиг баримт хадгалж боловсруулахад хүрэлцэх хэмжээ бөгөөд фото зураг зэрэг чухал шаардлагатай зарим файлуудын нөөц хадгаламж хэлбэрээр ашигласан ч болох юм.


Хиймэл гар суулгаж эхэлжээ

Гэмтэж бэртсэн гараа тайруулж хиймэл гар суулгуулсан тохиолдол сүүлийн нэг жилийн дотор хоёр дахь удаагаа гараад байна. Энэ нь үр дүн муутай биологийн эмчилгээний оронд технологийн дэвшилийг ашигласан хиймэл эрхтэн суулгахыг илүүд үзэх болсоны баталгаа байж болох юм.

Milo
Milo хэмээгдэх нэгэн өвчтөн 2001 онд мотоциклийн ослоор хүнд гэмтэл авч, түүний хөл болон зүүн мөр нь бяцарсан байна. Ослын үед мөрний мэдрэлийн судлууд нь гэмтсэнээс зүүн гар нь саажилттай болсон боловч мэдрэлийн судлууд шилжүүлэн суулгах мэс засал хийлгэсний үр дүнд гар болон хөлийнх нь ажиллагааг бүрэн сэргээж чаджээ. Харин мэс заслын болон бусад эмчилгээ 10 жилийн турш үргэлжилсэн боловч түүний зүүн гарын сарвуу мэдээгүй болж саажсан байна. Эцэст нь Венийн анагаахын их сургуулийн профессор Oskar Aszmann түүнд гараа тайруулж хиймэл гар суулгахыг санал болгожээ. Түүнд суулгасан хиймэл гарыг германы Otto Bock протезийн үйлдвэрт бүтээсэн бөгөөд бугуйн мэдрэлийн дохиоллуудыг таних 6 ширхэг мэдрэгчээр тоноглогдсон байна. Өвчтөний тархинаас ирэх гарын хөдөлгөөнийг удирдах дохиоллууд бугуйгаар дамжиж хиймэл гаранд хүрдэг. Хиймэл гар нь түүнийг нь механик хөдөлгөөн болгон хувиргадаг байна. Хүлээн авч буй дохиоллыг нэмэгдүүлэхийн тулд өвчтөний бугуйнд нэмэлт мэдрэлийн судлууд болон булчингийн хэсгийг суулгасан байна. Одоогоор түүнд хиймэл гар суулгах ажиллагаа амжилттай болсон эсэхийг хэлэхэд эрт байгаа боловч хэрэв амжилттай болсон тохиолдолд тэрээр хиймэл гар суулгуулсан дэлхийн 2 дахь хүн болох юм.

Patrick
Өнгөрсөн жил 24 настай Patrick ийм төрлийн мэс засал хийлгэсэн анхдагч хүн болсон юм. Тэрээр ажлын байран дээрээ цахилгаанд цохиулан зүүн гарынхаа хуруунуудыг алдсан байна. 3 жилийн дараа мөн л Aszmann докторын зөвлөсний дагуу хиймэл гар суулгуулжээ. Одоо тэрээр хиймэл гарынхаа тусламжтайгаар гутлын үдээсээ өөрөө үдэх, алдаж унагалгүйгээр шилэн аяганд ус хийх зэрэг үйлдлүүдийг хийж чаддаг болжээ. Түүний хиймэл гар мөн адил Otto Bock компаний бүтээл бөгөөд бугуйн эргэлт, нугаралт - гэдийлт болон хурууны гэсэн 3 төрлийн хөдөлгөөн хийж чаддаг байна. Мөн хуруунууд нь чимхэх болон атгах хөдөлгөөн хийж чаддаг. Хүний тархинаас мэдрэлийн системээр дамжин бугуйн хэсэгт очих дохиоллыг хүлээн авч хиймэл гарын хөдөлгөөнийг удирдах процесс маш нарийн төвөгтэй учир ийм төрлийн технологийг одоогоор бүрэн хөгжүүлж чадаагүй байна. Гэсэн хэдий ч Patrick судалгааны төвшинд хэд хэдэн төрлийн хөдөлгөөнийг хиймэл гараараа гайхалтай гүйцэтгэж чадаж байгаа ажээ.

Хиймэл эрхтэний технологид одоогоор шийдэгдээгүй байгаа гол асуудал нь мэдрэлийн системийн эргэх холбоо юм. Өөрөөр хэлбэл савтай сүү барьж явахдаа гулгаж унахгүй гэдэгт итгэлтэй байх, алхах мэтээр өөрийн хиймэл гараа савлаж байгааг мэдрэх мэдрэмжийг бий болгох шаардлагатай гэсэн үг юм. Otto Bock компаний ийм төрлийн технологид зарим талаар дэвшил гарч байна. Хиймэл эрхтэнээс үүссэн чичиргээний дохиолол нь атгах хэлбэр, хурд, гарны байрлалаас хамаарсан параметрүүдийн илэрхийлэл байх юм. Хиймэл гар нь адил төрлийн протезуудын эхнийх нь бөгөөд цаашид гарны бүтэн үе мөч, өвдөг, нүд зэрэг эрхтэнүүдийг хиймлээр орлуулан хийх боломжтой болох ажээ.




эх сурвалж, singularityhub

Трансформер мотоцикл

Америкийн залуу зохион бүтээгч Benjamin Gulak 1 болон хос дугуйт хэлбэрт хувирах чадвартай трансформер мотоцикл зохион бүтээсэн байна. Тэрээр 4 жилийн өмнө эцгийнхээ хамт азийн орнуудаар аялж явахдаа хятадын томоохон хотуудын агаарын бохирдлын ихэнхийг шатахуунаар ажилладаг хөдөлгүүр бүхий жижиг оврын мопед, мотоциклүүд үүсгэж байгааг өөрийн нүдээр үзсэн үеэс эхлэн шинэ загварын мотоцикл бүтээх санаа төржээ. Uno III Streetbike загварын энэхүү мотоцикл зориулалтын цахилгаан төхөөрөмжийн тусламжтайгаар хойд дугуйн тэнцвэрийг хадгалах бөгөөд ганц товчлуур дарах төдийд урд дугуй хойд дугуйтай зэрэгцсэн байрлалд шилжин байрласнаар 1 дугуйт хэлбэрт хувирдаг байна. Ийм хэлбэрт хувирсан тохиолдолд хойд дугуйнууд үндсэндээ нэг дугуйн үүрэг гүйцэтгэх учир мотоциклийг хангалттай налуулах боломжтой бөгөөд жолоочид богино зайд хялбархан маневр хийх боломж олгодог байна.

Уг мотоцикл нь 2 болон 3 дугуйт гэсэн 2 хувилбараар бүтээгджээ. Uno буюу 2 дугуйт хувилбар нь урагш, хойш хөдлөх болон бага хурдаар жолоодоход зориулагдсан бол мотоцикл буюу 3 дугуйт хувилбар нь аюулгүй байдлыг хангаж, илүү тогтвортой, өндөр хурдтай давхих боломжтой юм. Энэхүү мотоцикл нэг дугуйт хэлбэрт 48 км/ц хүртэл хурдалдаг бол 3-4 цагийн хугацаанд цэнэглэж нийт 48-56 км зай туулах чадвартай юм. Одоогоор зохион бүтээгчийн үүсгэн байгууласан BPG Motors компанид үйлдвэрлэж эхлэж байгаа бөгөөд худалдаалагдах үнийг 7500 доллараас хэтрүүлэхгүй байхаар төлөвлөж байна.






эх сурвалж; mailonline

Фүкүшимагийн эргэн тойронд-1

Фүкүшима Дай-Ичи АЦС-д осол гарсанаас хойш 2 сар гаруйн хугацаа өнгөрч байна. Энэ хугацаанд реакторууд болон хэрэглэсэн түлш хадгалах савнуудын хөргөлтийг тодорхой хэмжээгээр тогтворжуулж, цацраг идэвхт бодисын алдагдлыг үндсэндээ зогсоогоод байна. Токио Дэнрёкү компани реакторуудын хөргөлтийг найдвартай горимд оруулахад 3 сар, цаашид бүрэн аюулгүй болгох хүртэл дахин 6 сарын хугацаа тус тус шаардагдана хэмээн мэдэгдэж байсан юм. Харин хэд хоногийн өмнөөс 1-р реакторын хэсгийн цацраг идэвхт бодисын өндөр агууламж бүхий агаарыг соруулан авч хүн ажиллах нөхцөл бүрдсэнээр хөргөлтийн үндсэн системийг ажиллагаанд оруулах ажил эхлээд байв. Гэтэл хамгийн аюул багатай гэгдэж байсан тус реакторын түлшний бортогнууд бүрэн хайлж (melt down), реакторын ханыг гэмтээн хайлсан түлш хамгаалах савны ёроолд тунасан байгаа нь илэрлээ. Түлшний бүрэн хайлалт осол болсоноос хойших хэдэн цагийн хооронд явагдсан гэж үзэж байна. Мөн 1-р реакторын подвалын хэсэгт тус АЦС-д осол болсоноос хойш хамгийн өндөр үзүүлэлт буюу 2000 млЗв цацраг идэвхжил бүхий 3000 тонн орчим ус тунасан байгааг илрүүлэв. Энэ нь реакторыг хөргөх зорилгоор шахаж байсан ус хайлсан түлшний цацраг идэвхт бодисоор бохирдон реакторын хамгаалах савны зай завсараар алдагдсан ус юм. Өмнө нь түлшний бортогоны хайлалтын хувь хэмжээг 1-р реакторт 55%, 2, 3-р реакторт 35%, 30%-д тус тус хүрсэн гэж үзэж байсан бөгөөд 2, 3 -р реакторт ч мөн адил түлш бүрэн хайлсан байж болохыг үгүйсгэхгүй байна. Эдгээр нөхцөл байдлаас үүдэн АЦС-г бүрэн аюулгүй болгоход төлөвлөж байгаагаас илүү урт хугацаа шаардагдаж магадгүй байна.

АЦС-д осол үүссэн нөхцөл байдал болон түүнээс гарсан сөрөг үр дагаварыг арилгах, цаашид тохиолдох хүндрэлүүдийг даван туулах талаар хэвлэл мэдээллийн байгууллагууд болон эрдэмтэн судлаачдын дунд өргөн хэмжээнд хэлэлцэгдэж байна. Фүкүшима Дай-Ичи АЦС-ын зураг төслийг Тошиба болон Хитачи компанийн мэргэжилтнүүд хамтран гүйцэтгэсэн байдаг. Тус АЦС-д осол үүсэхэд нөлөөлсөн гол хүчин зүйл нь байгалийн гамшигийн нөлөөллийг дутуу тооцсон явдал гэдэгтэй дийлэнх мэргэжилтнүүд санал нийлж байна. Зураг төслийн явцад АЦС-ыг 8 магнитудын газар хөдлөлтийн чичирхийлэлт болон 5.7 м өндөртэй цунамигийн давалгаанаас хамгаалагдахаар тооцсон байдаг байна. Гэхдээ газар хөдлөлтийн чичирхийллийн нөлөөллийг голлон тооцоолж, цунамигийн аюулыг бүрэн хэмжээнд хангалттай тооцоолж чадаагүйгээс ослын нөхцөл үүссэн юм. Газар хөдлөлтийн чичирхийллийн хүч төслийн дээд хэмжээнээс 1 магнитудаар илүү байсан боловч АЦС-д ноцтой хохирол учруулаагүй. Харин цунамигийн давалгааны өндөр 14 м-т хүрч зураг төслийн явцад тооцоолж байсан хамгийн дээд хэмжээнээс даруй 3 дахин илүү байснаас АЦС-ын үндсэн байгууламжуудийн дийлэнх хэсэг 5 м хүртэл гүнтэй усанд автагдсан байна. Мөн ослын үед гол үүрэг гүйцэтгэх дизел станцууд (цахилгааны гадаад эх үүсвэр), хөргөлтийн үндсэн системийн насосуудыг далай талд байрлуулсан нь давалгаанд хамгийн түрүүнд өртөж ажиллагаагүй болоход нөлөөлжээ.

Мөн Фүкүшима АЦС-г хариуцагч Токио Дэнрёкү компаний үйл ажиллагаанд дийлэнх хүмүүс шүүмжлэлтэй хандаж байна. Хэдийгээр өмнөх 1000 жилийн хугацаанд ийм хэмжээний хүчтэй газар хөдлөлт, цунами тус бүс нутагт тохиолдож байгаагүй, байгалын гамшгийн хүчийг хангалттай тооцоолох боломж хомс байсан боловч аюулын цар хүрээг зарим талаар урьдчилан тооцоолж, түүнээс хамгаалах арга хэмжээ шаардлагатай түвшинд хүрэхгүй байгааг сануулж байсан тохиолдлууд осол болохоос өмнө цөөнгүй удаа гарч байжээ. 2009 онд Засгийн газар, Токио Дэнрёкү, орон нутгийн засаг захиргааны хамтарсан ээлжит хуралд 869 онд тухайн нутагт тохиолдсон Шооган хэмээгдэх газар хөдлөлтийн судалгаа хийсэн эрдэмтэд цунамигийн давалгааны өндөр тооцоолж байгаагаас илүү гарах магадлалтай, АЦС-ын хамгаалалтыг сайжруулах шаардлагатай хэмээн мэдэгдэж байсан боловч Токио Дэнрёкү компанийхан судалгаа бүрэн бус гэдгээр шалтаглан хүлээж аваагүй байна. Мөн нэгэн эрдэмтэн тус бүс нутагт тохиолдож болох цунамигийн симуляци хийж хэдэн сарын өмнөөс танилцуулж байсан нь энэ удаагийн газар хөдлөлтөөс үүссэн цунамигийн тархалттай ихээхэн ойролцоо үр дүнг үзүүлж байсан байна. Япон улсын газар нутгийн дийлэнх хэсэгт газар хөдлөлт, цунами, галт уулын дэлбэрэлт, тайфуны аюул тогтмол заналхийлж байдаг учир энэ талын судалгаа эрчимтэй хөгжсөн байдаг. Эрдэмтэд хэдийгээр байгалийн гамшгийн аюулыг тодорхой хэмжээгээр тооцоолж урьдчилан сануулсаар ирсэн боловч тэр бүхнийг тооцож хамгаалалтын систем боловсруулахад асар өндөр хэмжээний өртөг зардал шаардагдах нь ойлгомжтой юм. Токио Дэнрёкү компани эрдэмтэдийн саналыг тэр бүр авч үзэж байгаагүй нь үүнтэй холбоотой байж болох юм.

Мөн байгалийн гамшгийн аюулыг сэрэмжлүүлсэн эрдэм шинжилгээ, судалгааны бүтээлүүд тогтмол нийтлэгдэж тэдгээрт үндэслэсэн нийтлэл нэвтрүүлгүүд ч хийгдсээр ирсэн. Тухайлбал Фужи галт уул дэлбэрэх тохиолдолд түүнээс цацагдсан үнс нурам Токио хотыг бүрхэнэ. Галт уулын үнсний ширхэгтүүд компьютер болон электрон системийг гэмтээж тэдгээрийг ажиллагаанаас бүрэн гаргаснаар нийслэл хотын амьдрал зогсох магадлалтай тухай нэвтрүүлгүүд хийгдэж байсан.  Орчин үед шинжлэх ухаан технологи өндөр хөгжсөн боловч газар хөдлөлтийг урдьчилан мэдэж чадах хэмжээнд хараахан хүрээгүй байна. Харин газар хөдлөлт тодорхой хугацаанд давтагдах шинж чанартай байдаг учир өмнө тохиолдсон хөдлөлтүүдийг судлан дараагийн газар хөдлөлт хэдий хугацаанд тохиолдож болохыг харуулсан судалгаанууд хийгдэж тэдгээрийн үр дүнгээр шаардлагатай арга хэмжээнүүдийг төлөвлөж байна. Ийм төрлийн судалгааг тус улсын засгийн газрын харьяаны мэргэжлийн байгууллагууд нэгтгэн гаргаж нийтэд танилцуулдаг. Фүкүшимагийн АЦС-ын осол Япон улсын засгийн газар болон бусад салбарт эрдэмтэдийн дуу хоолойг хангалттай сонсох шаардлагатайг мэдрүүлсэн үйл явдал болж байна. Саяхан Хамаока АЦС-ын ажиллагааг зогсоохоор шийдвэрлэсэн нь үүний нэг илрэл юм. Япон улсын газар нутаг Евроази, Номхон Далай, Филиппины гэсэн хавтангуудын уулзвар дээр оршдогоос газар хөдлөлтийн идэвхтэй бүсүүдийн нэгд тооцогддог. Мөн тус улсын хамгийн том хотууд болох Токио, Осака, Нагояагийн ойролцоо Токай (зүүн далай), Нанкай (өмнөд далай), Тонанкай (зүүн өмнөд далай) хэмээх газар хөдлөлтийн идэвхтэй томоохон голомтууд оршдог бөгөөд тэдгээрийн нэгнийх нь хүрээнд Хамаока АЦС байрлаж байгаа юм.

2009 онд гаргасан ойрын 30 жилийн хугацаанд тус улсын нутагт хөдлөх магадлал өндөртэй томоохон газар хөдлөлтийн голомтыг харуулсан зургаас Хамаока АЦС-ын орчимд 6.7 - 7.2 магнитудын газар хөдлөлт болох магадлал 70% байгааг гэдгийг харж болно. Өмнөх мэдээлэлд дурдсанаас тоон утгын хувьд зөрж байгаа шалтгаан нь цаг хугацааны хувьд шинэчлэн хийсэн өөр өөр судалгааны үр дүн байж болох юм (шалгах боломж байсангүй). Гэхдээ аль аль нь магадлал харьцангуй өндөр байгааг харуулж байна. Сонирхолтой нь 3-р сарын 11-ны газар хөдлөлт болсон районд 7.5 магнитудын газар хөдлөлт болох магадлал зураг дээрх хамгийн өндөр үзүүлэлт буюу 99% байгааг бид харж байна. Юутай ч энэ жишээ япончууд ирээдүйд тохиолдож болох байгалийн гамшигуудын тухай хангалттай төсөөлөлтэй байгаагийн нэг илэрхийлэл юм. Харин тэдгээрээс урьдчилан сэргийлэх үйл ажиллагаа ямар түвшинд байгааг эргэн дүгнэхэд нь Фүкүшимагийн осол томоохон сургамж болж байна.

Ирэх 30 жилийн дотор газар хөдлөлт болох хамгийн өндөр магадлалтай газрууд

Газар хөдлөлтийн  идэвхтэй томоохон голомтууд

Газрын гүний хавтангуудын байрлал

Робот сурталчилгаа таныг хаа ч дагана

Белгийн зар сурталчилгааны Duval Guillaum агентлаг Alfa Romeo автомашины сурталчилгаанд зориулан гайхалтай санаа сэдсэн байна. Энэ нь магадгүй ирээдүйн зар сурталчилгааны бизнесийн шинэ төрхийг тодорхойлж байж болох юм. Робот удирдлага бүхий сурталчилгааны самбарууд хүмүүсийг хүссэн ч хүсээгүй ч дагасаар байх болно. Уцаар төрмөөр самбарууд замд чинь тээглэж "худалдаж авахаас нааш салахгүй шүү" гэсэн утгатай өгүүлбэр бүхий машины зургийг харуулж, залхтал чинь дагах болно. Бичлэгт үзүүлж буй сурталчилгааны самбаруудыг хэрхэн удирдаж байгаа нь тодорхойгүй боловч хүн алсын зайнаас удирдаж байгаа мэт харагдаж байгаа юм. Хэдий тийм боловч орчин үеийн технолигоор иймэрхүү төхөөрөмжийг бүрэн автомат удирдлагатайгаар бүтээх боломжтой болсон билээ. Ердийн интернетийн хайлтын систем ашиглахаас авахуулаад төрөл бүрийн хэлбэрээр зар сурталчилгаа эрхлэгчид таны сонирхолыг таньж мэдрэн зөвхөн таньд зориулсан сурталчилгаа үзүүлж байгааг хэн бүхэн анзаарч байгаа билээ. Эцэст нь магадгүй аймшгийн кинон дээрээс л харж болох тэдний тухай төсөөллийг сонирхоцгооё.

Тэд таныг юу худалдаж авах дуртайг мэднэ.
Тэд таныг ямар дэлгүүрт ихэвчлэн очдогийг мэднэ.
Тэд танд үргэлж ямар нэгэн зүйл санал болгоход бэлэн байдаг.
Мөн тэд хэзээ ч, бүр хэзээ ч шантрахгүй.



эх сурвалж; singularityhub

Хэрэв та сансарт төөрвөл...

Таньд хэзээ нэгэн цагт ойролцоох орчлон ертөнцөөс үйлчилгээ сайтай кафе хайх цаг ирж магадгүй юм. Тэгж яваад төөрчихвөл яах вэ. Ийм тохиолдолд энэ зураг таньд туслана. Энэ бол Сүүн замын энгийн нэг хэсгийн зураг биш, орчлон ертөнцийн хязгааргүй орон зайд бидний оршин байгаа хумхын тоос адил бяцхан ертөнцийн байрлалыг бусад эрхэстэй харьцуулан зааж өгнө. Энд дарж, томруулан үндсэн хэмжээгээр үзэх боломжтой.


эх сурвалж; gizmodo

Гар утасны технологийн хөгжлийн тухай товчхон

Сүүлийн жилүүдэд дэлхийн улс орнууд гар утас буюу утасгүй харилцаа холбооны хөгжлийн 4-р (4G) үед шилжиж эхэлж байгаа билээ. Мөн манайд хэдэн жилийн өмнө хөдөлгөөнт интернетийн 4G Mobile Wimax утасгүй систем байгуулагдсан боловч гар утасны технологид хараахан нэвтэрч эхлээгүй байна. Энэ удаад гар утасны хөгжлийн үе шатуудын тухай товч танилцая.

0G
Утасгүй харилцаа холбооны технологи 1940-өөд оны дунд үед үүсч бий болсон боловч 1980-аад оноос нийтийн хэрэгцээнд нэвтэрч эхэлсэн байна. Зарим мэргэжилтнүүд утасгүй холбооны технологийн хөгжлийн эхний шатыг 0G хэмээн нэрлэдэг. Энэ үеийн гар утаснууд радио долгионы зарчимаар ажилладаг бөгөөд овор, жин ихтэй байсан учир ихэвчлэн автомашинд суурилуулан ашигладаг байжээ. Мөн одоогийн Иридиум системтэй төстэй сансарын холбооны технологи бүхий гар утаснууд усан онгоцны холбооны зориулалтаар ашиглагдаж байсан байна.


1G
1982 оноос эхний шатны гар утаснууд бүтээгдэж хүний дуу хоолойг аналоги долгион хэлбэрээр дамжуулж дууны өнгөнөөс хамаарах тасралтгүй дохиоллыг ашигладаг болов. Дохиоллын зурвасын хүрээ өргөн боловч, харьцангуй том хэмжээний батерей шаардагддаг, хөндлөнгийн элдэв дохиоллын нөлөөлөлд өртөмтгий, хамгаалалтын систем муу буюу зарим онцлог төхөөрөмж бүхий хүн бусдын яриаг хөндлөнгөөс сонсох боломжтой байжээ. Хамгийн сул тал нь бусдын утасны дугаарыг хуулж аваад өөрийн дураар ашиглах боломжтой байв.

2G
1991 оноос 2G стандарт боловсруулагдаж PDC, GSM мэтийн дижитал системүүд ашиглагдах болов. Энэ технолиги нь дуу хоолойг 1 буюу 0-оор илэрхийлэгдэх тоон дохиолд хувирган дамжуулдаг учир дээр дурдсан дутагдалуудыг бүрэн арилгасан, илүү найдвартай систем болсон байна. Мөн дохиоллыг кодлон хувиргаж хамгаалалтын шаардлагуудыг бүрэн хангасан учир дохиоллын илүү нарийн зурвасыг хамарч, харьцангуй бага энерги зарцуулдаг учир батерейн хэмжээг жижигрүүлэх боломжтой болов. Мөн үнийн хувьд харьцангуй хямд болсон байна. Өөр нэг онцлог нь энэ үеийн технологиос эхлэн гар утсаараа SMS буюу богино хэмжээний текст илгээх, хүлээн авах боломжтой болсон байна. Адил урттай радио долгионы хүрээнд их хэмжээний харилцан ярианы долгионыг шахах боломжтой болсон учир гар утасны оператор компаниуд олноор байгуулагдаж, дэлхий даяар түгэн дэлгэрч эхэлсэн юм.

3G
Олон улсын Телефон Харилцаа Холбооны байгууллагаас IMT-2000 хэмээх хөдөлгөөнт утасны стандартыг тодорхойлсон бөгөөд анхны 3G системийг 2001 онд Япон улсын NTT Dokomo компани нэвтрүүлсэн байна. Энэ шатанд W-CDMA, CDMA2000 зэрэг өндөр хурдны дижитал системүүд голлож байна. 3G системийн гар утсаар дуу, дүрс болон өгөгдлийг өндөр үр ашигтайгаар дамжуулдагаас гадна интернетээр аялж мэдээлэл татаж авах, youtube видео үзэх, фото зураг агуулсан текст мэдээлэл илгээх боломжтой болсон байна. Мөн 3.5 G хэмээх завсрын ангиллыг гаргаж ирсэн бөгөөд интернетээс мэдээлэл унших хурдаар ялгагдаж байна. 3G системээр интернетэд ойролцоогоор 200-700 кб/с хурдаар холбогддог бол 3.5 G системд 3.6 - 7.2 Мб/с хүртэлх хурдтай холбогдох боломжтой юм. Өөрөөр хэлбэл broadband буюу өргөн зурвасын интернетийг утасгүй технологиор хүлээн авах боломжтой болжээ. Харин 2009-2010 онд гарсан хамгийн сүүлийн үеийн зарим системүүд 15-24 Mб/с хурдыг санал болгож байна.

4G
Гар утасны TeliaSonera компани хамгийн анхны 4G сүлжээг Норвег болон Шведийн Осло, Стокольм хотуудад байгуулж 2009 оны 12 сард ашиглалтад оруулсан байна. Мөн 2010 оноос АНУ, Япон зэрэг улсуудад 4G системд шилжиж, гар утас болон бусад хөдөлгөөнт төхөөрөмжүүд IP-д суурилсан хөдөлгөөнт өргөн зурвасын сүлжээнд 50 Мб/с-ээс 100 Мб/с хүртэлх хурдаар холбогдон интернет, өндөр чанар бүхий телевизийн нэвтрүүлэг, видео, онлайн тоглоом тоглох зэргээр орчин үеийн интернетэд суурилсан бүх төрлийн үйлчилгээг хүртэх боломжтой болж байна. Холболтын хурдаар өмнөх үеэс 10 дахин илүү бөгөөд цаашид 1Гб/с-д хүргэх боломжтой. 4G үеийн голлох 2 систем нь LTE-Advanced болон WiMаx2 стандартууд бөгөөд аль аль нь хүчин чадал сайтай боловч өндөр өртөг шаардагдсан технологиуд юм. АНУ-д Sprint Nextel, Comcast компаниуд Mobile WiMAX сүлжээг байгуулж , 2010 оны 6 сараас анхны 4G гар утас HTC EVO-г худалдаалж эхэлсэн байна. Гар утасны дэлхийн хамгийн том оператор компани болох China Mobile ирэх жилээс 4G системд шилжихээ мэдэгдсэн билээ. Япон улсын хувьд Мобиком компаний хөрөнгө оруулагчдын нэг болох KDDI компани анхлан 4G системд шилжиж байна. Гэхдээ өөрийн сүлжээ байгуулаагүй бөгөөд Uq Wimax компаний сүлжээг ашиглаж байна.

5G?
Хөдөлгөөнт холбооны 4G системд бүрэн шилжсэнээр бүх төрлийн зөөврийн төхөөрөмжийн интернет холболтын хурд 1Гб/с-д хүрч өнөөдрийн бидний хэрэглэж, хөгжүүлж, төсөөлж байгаа ямар ч үйлчилгээг хүртэхэд саадгүй болох юм. Иймд одоогийнхоос цааших буюу 5G систем байх эсэх нь одоогоор тодорхойгүй байна.

"Эрчүүдийн зүрхэнд ходоодоор нь дамжиж хүрдэг"

"Эрчүүдийн зүрхэнд ходоодоор нь дамжиж хүрдэг" хэмээх цуу үг удаан хугацааны туршид хүмүүсийн дунд амь бөхтэй оршсоор ирсэн билээ. Гэхдээ энэ үг үнэний хувьтай байсан бололтой. Эрчүүд сексээс илүүтэйгээр унтах, хооллох тухай олон удаа бодож байдаг гэдгийг судлагаагаар тогтоосон байна. Энэ нь эмэгтэйчүүдтэй харьцуулахад 3 дахин их үзүүлэлт бөгөөд эрчүүд 7 секунд тутамд нэг удаа сексийн тухай бодол болж явдаг гэсэн түгээмэл ойлголт худал гэдгийг батлаж байна. Эрчүүд үнэн чанартаа өдрийн туршид цагт 1 удаа л энэ тухай боддог байна. АНУ-ын Охио их сургуулийн профессор Terri Fisher эрэгтэй эмэгтэй 163 оюутнаас судалгаа авахад 1 оюутан хоногийн туршид 388 удаа сексийн тухай бодож байдаг гэж хариулан рекорд тогтоожээ. Гэхдээ нийт эрэгтэй оюутнуудын дундаж үзүүлэлтээр сексийн тухай бодол унтах, идэх тухай бодлоос илүү гарч чадаагүй байна. Рекорд тогтоосон оюутан 158 секундэд нэг удаа сексийн тухай бодож байсан нь дээр дурдсан түгээмэл ойлголтоос даруй 22 дахин бага үзүүлэлт юм.



эх сурвалж; mailonline

Барилгын ганхалтын хугацаа стандартаас 13 дахин давсан

3-р сарын 11-ний газар хөдлөлтийн үед Токио хотын Шинжүкү дүүргийн 54 давхар, 223м өндөр барилгад 13 минутын турш ганхалт ажиглагдаж тус улсын өндөр барилгын газар хөдлөлтийн эсэргүүцлийн нормын үзүүлэлтээс 13 дахин илүү гарсан байна. Барилгын ганхалтын хэмжээ хамгийн дээд давхарт 1м-ээс илүү байсан бол 60 м (20 давхар)-ээс дээш өндөртэй барилгуудын ганхалтын хэмжээ стандартаар газар хөдлөлтийн хүчнээс хамааралгүйгээр 1 минут орчим үргэлжилэхэд тэсвэртэй байхыг шаарддаг байна. Гэхдээ сүүлийн үеийн судалгааны үр дүнг тооцож Токио, Осака, Нагоя хотын өндөр барилгуудыг 8 мин хүртэл хугацаагаар үргэлжлэх ганхалтад тэсвэртэй байлгах нөхцөлөөр Зам харилцаа, дэд бүтцийн яамнаас энэ жилд багтаан стандартын хэмжээг өөрчлөхөөр төлөвлөж байжээ. Харин энэ удаагийн газар хөдлөлт төлөвлөж байсан шинэ стандартын хэмжээнээс мөн адил давсан тул дахин судалгаа хийж хэмжээг шинэчлэн тогтоохоос өөр аргагүй болсон байна. 1997 онд Кобэ хотын орчимд болсон газар хөдлөлтийн үед барилгын ганхалтын үргэлжлэх хугацаа 6 минут орчим байжээ.

Газар хөдлөлт үндсэн голомтод мэдрэгдсэнээс хойш ойролцоогоор 3 минутын дараа барилгууд ганхаж эхэлсэн бөгөөд 6 минутын дараа хамгийн их ганхалт ажиглагдаж 3 секундийн дотор 108 см-т хүрч байжээ. Гэхдээ эдгээр өндөр барилгуудад ганхалтаас үүдэн ямар нэгэн ноцтой гэмтэл гараагүй юм. Тухайн барилгуудад суурилагдсан газар хөдлөлтөөс хамгаалах төхөөрөмжийн хүчин чадал 3 секундийн хугацаанд 140 см хүртэлх хэмжээний ганхалтын нөлөөллийг арилгах чадвартай юм. Газар хөдлөлтийн үед тэдгээр барилгуудын дээд давхаруудад байрлаж байсан хүмүүс хөл дээрээ зогсож чадахааргүй болтол барилга ганхаж байсан тухай ярьжээ. Япон улсад 60 м-ээс дээш өндөртэй барилга 1100 орчим байдаг. Тэдгээрийн хэдэн арваас 100-аар тоологдох барилгад ханын зарим хийц ховхорч унах, барилга тэнхлэг хазайх зэрэг согог илэрч цаашид газар хөдлөлтөөс сэргийлэх арга хэмжээг илүү сайжруулах шаардлагатайг харуулсан байна.



эх сурвалж; asahi

Хамаока АЦС-ыг зогсооно

6-ны өдөр Япон улсын ерөнхий сайд Кан Шизүока мужид байрлах Хамаока АЦС-ын үйл ажиллагааг томоохон хэмжээний газар хөдлөлт болох, түүнээс шалтгаалан АЦС-д учирч болох эрсдэлээс урьдчилан сэргийлэх зорилгоор бүрэн зогсоох хүсэлтийг тус станцыг хариуцагч Чүүбү Дэнрёкү (Төвийн бүсийн Цахилгаан Эрчим хүч) компанид тавьсан байна. Судалгаагаар тус АЦС-ын орчимд ирэх 30 жилийн хугацаанд магнитудын 8 баллын газар хөдлөлт болох магадлал 87%-тай байгаа юм. Хамаока АЦС-ын 1 болон 2-р реакторын ашиглалтын хугацаа дуусч бүрэн зогсоосон байгаа бөгөөд 4, 5-р реакторууд ажиллаж байгаа юм. Харин 3-р реактор засвар үйлчилгээ хийх зорилгоор түр зогсолтын байдалд байгаа бөгөөд ирэх 7 сараас ажиллуулахаар төлөвлөж байсан байна. АЦС-ыг дахин ажиллуулах хугацааны хувьд далан байгуулах зэргээр цунамигаас найдвартай хамгаалах арга хэмжээг бүрэн авах хүртэл ойролцоогоор 2-3 жил шаардагдах төлөвтэй байна. Энэ хугацаанд төвийн бүсийн цахилгаан хэрэглэгчдийн эрчим хүчний хангамж 10 хувь орчим хэмжээгээр дутагдах учир бусад эх үүсвэрээр хангах, хэмнэлтийн горимд шилжих шаардлага гарч байгаа юм. Одоогоор бусад АЦС-уудыг зогсоохоор төлөвлөөгүй байна.


эх сурвалж; mainichi

Aй-фонд зориулагдсан google орчуулагч

Penpower Technology компани Aй-фон утсанд зориулан google орчуулагчийн апликэшн програмыг гаргасан байна. Энэ програм нь өмнө мэдээлж байсан WordLens програмтай төстэй бөгөөд утасны камераар харагдах гудамжны самбар, ном хэвлэл, онлайн сонин зэрэг хэвлэмэл үсгэн дүрслэлээс сонгосон үгний хятад, англи, япон, солонгос, франц, герман, итали, испани орчуулга болон тайлбарыг тухайн эгшинд харуулах чадвартай юм. Гэхдээ зөвхөн iOS 4.2 болон түүнээс хойших хувилбар бүхий Ай-фон 3GS/4 утсанд суулгаж ажиллуулах боломжтой. Мөн орчуулга хийгдсэн үгсийг хадгалж дараа дараачийн орчуулгыг илүү хурдан гүйцэтгэхээс гадна гадаад үгийг зөв хэрэглэж сурахад дөхөмтэй хувилбарыг санал болгодог. Орчуулга хийхийн тулд текстийн фото зургийг авах шаардлагатай бөгөөд сонгосон үгийн утга, дуудлага, адил төстэй болон бусад шаардлагатай үгнүүдийг эрж олдог байна. Мөн үгсийг дэлгэцийн даралтаар шууд бичиж оруулах боломжтой. Энэ програм iTunes дэлгүүрт 4.99 долларын үнэтэйгээр худалдаалагдаж байна.


эх сурвалж; gizmag